حكيم زمانه

ملتقى الراغبين فى الثقافة الجادة و الحوار الهادف و المعلومة الصحيحة به عدد من الأقسام التثقيفية و الترفيهية و قسم لهواة الأعشاب و ما يتعلق بها
 
الرئيسيةالتسجيلدخول

شاطر | 
 

 لو شن قالب للجسم ..جميل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حكيم زمانه
Admin
avatar

ذكر عدد الرسائل : 350
العمر : 46
تاريخ التسجيل : 18/05/2008

مُساهمةموضوع: لو شن قالب للجسم ..جميل   الجمعة نوفمبر 07, 2008 9:08 pm

اعضاء
الجروب المحترمين ..اهلا بيكو مرة تانيه و تالته بعد المئة مع حلقة جديدة
من برنامج وصفاتى غيرتلى حياتى ...من اعداد و تقديم المذيع الموهوب حكيم
زمانه ...جا لى رساله انهاردة من عضوة محترمة بتقولى يا حكيم بطل استظراف
و خليك جد ..و صفاتك كويسة متبوظش الموضوع بكتر الكلام و التهريج ...طبعا
كلامها بتصرف ...و انا من وجهة نظرى الشخصية ان المجال ده مينفعشى نتكلم
فيه الا بالطريقة دى ...يا جماعة الناس مخنوقة ..و مبؤوؤة ..و البشر بياكل
فى بعضه ...و العضو من دول عاوز حاجة خفيفة تنهضم ..مش تقف على مراوح
دماغه تشيطها ...تخيلى و تخيل معى و احد طول النهار مدعوك فى الاوتوبس و
المكاتب و الموظفين اللى بيخانقو دبان وشهم ...يا جماعة انا رحت مرة مصلحة
حكومية لقيت الهانم الموظفة نازلة رغى مع صاحبتها ...لو سمحتى يا ابله
..بليز يا هانم ..ارجوكى يا حاجة ...ابوس رجل ام ابوكى يا خالتى ...و بعد
بوس الرجلين ده بصت لى ...و حملقت ...و بحلقت ...و تجعلصت ...و تقرطست
...وقالت لى بكل وضوح ___الله ..مش شايفنى باتسهرا يا استاذ___اه تصدقى
انا مش شايف ...مش حضرتك تقولى او حتى تزمرى ... الهانم بتتساهر و تحكى يا
جماعة ..طيب ازاى انا اقطع حديثها ..قلة زوء صحيح ...طيب تخيلو واحد سمع
ده كله و جه فتح الجروب لقى حكيم زمانه باة عاملى فيها فان دار سار ..بتاع
الكيميا الحيوية ..و لا بتهوفن بتاع الفيزياء ..و لا حتى عمرو دياب بتاع
الجغرافيا ...و بيقول سيادته ...تركيبة انهاردة ايها السادة ..مقشرة و
منشطة و تحتوى على العديد من الفبروكيماويات المتفذلكة ..و يحتوى الجرام
منها على نص كيلو من المواد المزغرطة للبشرة ..ومن الجدير بالذكر انه فى
معامل ارحمنى يابا ..فى ولايه هنديانا فى الولايات المنتحلة سابقا ..اثبت
طاقم من الاساتذة ...ان جميع المفبركات تعتبر مهربات ..وان جميع المهربات
تؤل الى كونها مسيبات ...و انه ابوك السقا لو ماممتش يبقى برضو مات ...لان
القاعدة انه اقلب القدرة على فمها فقد لا تطلع البنت لامها لان امها ماتت
مع ابيها فى حادث جنوب شرق العراق ...اثر حادث اليم ...___هوة فى ايه ..دى
مش تركيبة و مش اسلوب ده انتحار ....وانا بصراحة ...مش ناوى استخدم عبوات
ناسفة ...فى الجروب ..
________
تركيبة انهاردة ...حاجة ظريفة جدا
...و شركات كتيرة بتعملها ...و هنعدل فيها لتكون مفيدة للجلد و البشرة
...هوة لوشن فى صورة قالب ...يعنى مرطب للجلد فى صورة صلبه شوية ...بمجرد
ما تلمس الجلد بتنصهر لترطب و تدى خصائص المواد الفعالة اللى فيها ..تعالو
نظبط كدة تركيبه ..
250 مل زيت زيتون
معلقتين كبار بابونج
معلقة كبيرة كانديولا
معلقة كبية كركديه مطحون
100 جم زبدة كاكاو
50جم زيت لوز مر
100 جم شمع نحل
نصف معلقة صغيرة نشا ذرة
معلقة صغيرة عطر مناسب افضل ان يكون اللافندر لفوايدة الجلدية
_____ركزو
ضع
زيت الزيتون فى حمام مائى...و ضع الاعشاب المطحونة فى الزيت و اتركه 3
ساعات حتى تستخلص العشب فى الزيت ...صفى الزيت جدااااااااااا..وخذ الخلاصة
الزيتية لونها هيكون حلو وكمان فوايدها ...البابونج مفيد جدا ومضاد
لالتهاب البشرة و الكالنديولا رائعة و مضادة لاى تشقق..الكركديه مصدر
لفيتامين سى و كذا مادة روعة للبشرة ..بالاضافة لزيت الزيتون نفسه كمرطب و
مجدد و مضاد للتجاعيد
هناخد من الخلاصة دى 50مل بس
نضيفها الى 50
جم زيت لوز مر و شمه الهسل فى حمام مائى ...و نيحهم ..ثم نضيف زبدة
الكاكاو ..لحد ميسيح الجميع ...نضيف اليهم نشا الذرة ..نقلب كويس قوى
علشان النشا ميكلكعشى ..على فكرة نشا الدرة جميل مضاد للاحتكاك و التهاب
البشرة ....اول ميمتزجو تمام ..صبيهم فى قوالب مناسبة ...علشان تبقى
تشليهم منها ..فى قوالب مخصوصة لذلك فى الاسواق ...قبل متصبيهم نسيت
..ضيفى الزيت المعطر اللى هوة اللافندر من وجهة نظرى ...امزجيهم جيدا
...صبيه ..سيبيه ينشف خالص ...ثم شيليه وضعيه فى اكياس بلاستيك..ممكن فى
درج التلاجة السفلى فى الصيف ..عند الاستخدام دلكى به المنطقة المراد
ترطيبها او علاج الالتهاب فيها او التشقق ...حاجة روعة و كلاس و جميلة
...و هتعجبكم جدا ..و شغلو ايديكم معايا
اتمنى لكم ...مش فاكر
د.حكيم زمانه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://hakeemzamano.hypeforum.net
 
لو شن قالب للجسم ..جميل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
حكيم زمانه :: وصفات الجروب :: وصفات الجسم-
انتقل الى: